অসমেৰ জাতীয় সংগীত
মূল: লক্ষ্মীনাথ বেজবড়ুআ
হে মোৰ নিজেৰ দেশ !
হে মোৰ চিকুণ দেশ !
এমন সুমধুৰ,
এমন সুফলা,
এমন আদৰৰেৰ দেশ ।
হে মোৰ সুৰালী ৰাও !
অসমেৰ মধুৰ ৰাও !
পৃথিবীৰ কুঠৈও
বিছৰিয়া জনমটা
নাপোআ কইৰ্লেও পাত ।
হে মোৰ জন্মেৰ জাগা !
হে মোৰ অসমী মাও !
দেখি নেং তুমাৰ
মুখখানি আকবাৰ
হাউশ মোৰ পালায় নাই ।
------------------------
ফুলতোলা হাতেৰ হুল
মূলঃ অনুভব তুলসী
কিছুতো আনুং নাই
ঐ দুইহাতেৰ থাকিয়া
তুই নাবুজিস ভুল,
দেখছিলুং খালি
লুকিআ ৰাখছিস কুঠৈ
ফুলতোলা হাতেৰ হুল ।
------------------------
ছিগৰেট
মূলঃ প্ৰণব কুমাৰ বর্মন
ছিগৰেট আকটা জ্বলেয়া নিলুং
প্ৰয়সীয়ে কৈল - 'উহু, ঐটা
নাচইলবো
ফেলাও ফেলাও
ছিগৰেট জীবনেৰ ভুল।'
আঙুলেৰ মধ্যত ঝুলিয়া থোয়া
এই জ্বলন্ত যাতনাক
মুঁই কলুং --- ছিগৰেট
নাহায়
এইলা ধোঙাৰ ফুল!
------------------------
নিষাদ গান্ধাৰ
মূলঃ ৰুবুল দাস
অত্তি কি - গৌৰীৰ নাভিকুণ্ড
এত্তি কি - শিবেৰ শিলাখণ্ড
কুঠৈৰ থাকিয়া ভাঁসিয়া আইসে বাতাসত
মৈথুনেৰ এই নিষাদ গান্ধাৰ
... আৰ্ গৌৰীৰ অক্ষত যোনিত
শিবে ডুবিয়া ধৰে মদন আঙুল
সুৰেৰ তালত ফুলিয়া উঠে
চান তাৰা বেলা ...
এইটা নাহায়, নাহায়, পাপেৰ শস্য
এইটা তো সৃষ্টিৰ সনাতন সত্য
অত্তি কি - গৌৰীৰ নাভিকুণ্ড
এত্তি কি - শিবেৰ শিলাখণ্ড
------------------------
অতো সহজ নাহায়
তোক বিদায় জানোআ
মূলঃ কন্দর্পজিৎ কল্লোল
(১)
নে নে নে
মোৰ আধা পোৰা
কইলজা
আৰো কিছু
যা লাগে অকে নে
প্ৰেম লাগে প্ৰেম নে
কইলজা লাগে
কইলজা নে
খুলিয়া খুলিয়া নে
(২)
যা লাগে তাকে নে
অচিন সৰস কাঠেৰ সুৰস বিছনা
তামস তামস তামসাবৃত্ত দিফৰ ৰাত্তি
উড়িআ উড়িআ আসা সৰীসৃপ মায়া
নে নে নে
মোৰ নীৰলস অলস নদী হলদীয়া ট্ৰেফিক ছিগনেল সো-সো
ধ্ৰুব আকাশ চালাথ কৰা মহঙা চান
ঘাটা ভুল কৰা
জয়াল জয়াল শ্বাপদ
হু-হু আৰাও
দীপক মেঘমল্লাৰ
নিষাদ গান্ধাৰ
যা লাগে অকে নে
পখিৰ যকৃত কইলজা হৃদপিণ্ডমাংস প্ৰদক্ষিণ অবিচল শাণিত তীৰ
(৩)
যা লাগে অকে নে
যাং বুলিআ নাকৈস
নাকৈস কিন্তু
নাকৈস ভুলতো
নে নে নে
যা লাগে অকে
দিবাৰ পাওআ মোৰ সমগ্ৰ আভূষণ ভৰুণ
নে নে নে
তলসৰা শেফালী
ৰাশি-ৰাশি কুঁআসা
কিন্তু নাকৈস নাকৈস
যাং বুলিআ নাকৈস
তুই যাং বুলিআ কোবাৰ পাইলে
আকগলা ৰক্তত
ডুব যাব চান
কাৰণ তোক
বিদায় জানাবাৰ নাপাইম
কেনেনা
তোক ভালপাওআ
যতো সহজ
অতো সহজ নাহায়
তোক বিদায় জানোআ
------------------------
তেজীমলা
মূলঃ কন্দর্পজিৎ কল্লোল
দুখ্যেৰ ডিঙা মেলিয়া দিলুং
অচিন নাবিক মুঁই
উজিয়াও যাইম
ভাটিয়াও যাইম
যায়া যায়া
তোৰ পানীতোলা ঘাটত জিৰাইম
হাতো মেলিম
ফুলো ছিৰাইম
কি কৰবি তুই
যুদিওবা অচিন নাবিক মুঁই
------------------------
আত্মপাঠ
মূলঃ স্পন্দন অনুৰাগ বর্মন
নন্দিতা
তুই মোৰ দুখ্যোৰ দিনেৰ ছাঁয়া দেওআ বটবৃক্ষ
নন্দিতা
তুই আকটা স্মৃতিৰ ফ্লেক ছিগৰেট
যাক হুপিয়া হুপিয়া লেখুং মুঁই
সাম্যবাদেৰ গান
নন্দিতা
তুই প্ৰতিমা পাণ্ডেৰ ঐ
হস্তিৰ কন্যা হস্তিৰ কন্যা বামুনেৰো নাৰী
তুই পল ৰবছনেৰ আশাৰ পান
নন্দিতা
তুই আকঝাকৰা ঝ'ৰি
আকমুঠা বাতাস
নন্দিতা
তুই মোৰ উজাগৰী ৰাত্তিৰ আধালেখা কবিতা ... ।
------------------------
"ভালপাং বুলিআ
নাকৈস"
মূল: উৎপল তালুকদাৰ
নকৈস মোক ভালাপাং বুলিআ,
নিসিঁচিস মোৰ শুকান হৃদয়তপ্রেমেৰ গুটি,
নাযাচিবা মোক
দুইদিনীয়া আদোৰ,
নাকৰস মোক তোৰ হৃদয়েৰ আপোন,
খুব কষ্ট হয় প্রেমত।
ভাঙিআ ছিঙিআ
গেইছে মোৰ হৃদপিণ্ড,
ক্রমাশঃ শুকিআ
গেইছে
এঠেই থাকা লাল ৰস,
তাংখুৰ ধোঁঙাএ
আন্ধাৰ কৰিআ
তুইলছে খালি
মোৰ হৃদয়েৰ কোঠাগুলান।
নাপাইম তোক সত্য
অর্থত ভালাপাবাৰ,
নাবিছিৰাং আৰো আকবাৰ প্রতাৰিত হোবাৰ,
ভয় লাগে প্রেমত
পৰিবাৰ,
কাৰন তাংখুত
থাকিআও
প্রেমে বুলে খুব
তাৰাতাৰি হত্যা কৰে
আকজন নিৰীহ
প্রেমিকক গোপনে।
ঐজৈন্যে মিচ্ অৰুন্ধতী,
আকবাৰো নাকৈস
মোক ভালাপাং বুলিআ।
------------------------
* সগ কয়টা কবিতাৰে ৰাওবদলকাৰী:
কন্দর্পজিৎ কল্লোল *
